किती महिन्यांच्या बाळाची मालिश करावी?

बाळाला मालिश करण्याची योग्य पद्धत तुम्हाला माहित आहे का?

बाळ जन्माला आलं की त्याची सगळ्या बाजूंनी नीट काळजी घ्यावी लागते. खास काळजी घ्यावी लागते त्याच्या शरीराची, कारण नवजात बाळाचं शरीर हे खूप नाजूक असतं. त्यामुळे त्याच्या शरीराला जपावं लागतं. त्याचं हेच नाजूक शरीर घट्ट आणि बळकट बनवण्यासाठी बाळाला मालिश केली जाते. बाळाला मालिश करण्याचे खूप फायदे आहेत. सगळ्यात महत्त्वाचा फायदा म्हणजे त्याच्या शरीराला आकार मिळतो आणि त्याचे अवयव सक्षम होत जातात. बाळाला देखील मालिश घेतल्यावर खूप छान वाटतं, तुम्ही देखील पाहिलं असले की मालिश घेताना जरी बाळ रडत असलं तरी जेव्हा मालिश पूर्ण होते आणि ते बाळाला आपण अंघोळ घालतो तेव्हा पाच मिनिटांत ते झोपतं, कारण त्याला मालिश केल्याने आराम मिळतो. त्यामुळे बाळाला मालिश ही करायलाच हवी, पण मंडळी, तुम्हाला हे माहित आहे का की मालिश करण्याची पण एक योग्य पद्धत आहे! हो, बाळाला कशीही मालिश करून चालत नाही, यामुळे त्याच्या शरीराला धोका होऊ शकतो, म्हणून आज आम्ही तुम्हाला सांगणार आहोत बाळाला मालिश करण्याचा योग्य मार्ग आणि सोबत काही गोष्टी जसे की मालिशमुळे नक्की काय फायदे होतात? बाळाला मालिश करणे कधीपासून सुरु करावे. चला तर जाणून घेऊया.

बाळाला मालिश करण्याचे फायदे

इंटरनॅशनल असोसिएशन ऑफ इंफेन्ट मसाज यांच्या म्हणण्यानुसार, मालिश केल्याने बाळाच्या शरीरातील रक्तप्रवाह उत्तम प्रकारे वाहतो आणि त्याची पचनशक्ती सुद्धा सुधारते. यामुळे बाळाला गॅस, अपचन, पोटदुखी यांसारख्या समस्या होत नाहीत. मालिश केल्याने स्नायूंवरचा तणाव सुद्धा कमी होतो आणि दात येताना होणाऱ्या वेदना सुद्धा कमी होतात. ज्या स्त्रियांची डिलिव्हरी नऊ महिने आधी होते, त्यांचं मुल सुद्धा मालिश दिल्यावर सक्षम होतं. जर तुम्हाला बाळाच्या आरोग्याबाबत काहीही शंका असेले तर तुम्ही एकदा डॉक्टरांचा सल्ला जरूर घ्यावा.

बाळाला मालिश कधी करावी?

बाळाच्या जन्मानंतर काही आठवड्यांनी तुम्ही बाळाला मालिश करायला सुरुवात करू शकता पण यासाठी तुम्हाला बाळाच्या मूडची खास काळजी घ्यावी लागते. मालिश देताना बाळ शांत असायला हवं. मालिश करताना इतक्या जोरात करू नये की बाळाला ते सहन होणार नाही. मायो क्लिनिकच्या अभ्यासानुसार, मालिश करताना जेव्हा बाळ हात मागे घेतं किंवा डोकं मागे खेचू लागतं तेव्हा समजावं बाळ मालिश घ्यायला तयार नाही. बाळाला मालिश देण्याची योग्य वेळ ही स्तनपान केल्यावर ४५ मिनिटांनी असते. दुध पाजल्यावर लगेच मालिश दिल्याने बाळ उलटी करू शकते.

बाळाला किती वेळा मालिश द्यावी?

बाळाला किती वेळा मालिश द्यावी या प्रश्नाचं उत्तर तुमच्यात आणि बाळातच दडलेलं आहे. काही आई वडील रोज बाळाची मालिश करतात, तर काही जण आठवड्यातून तीनदा बाळाची मालिश करतात. त्याच्या दिवसाची सुरुवात चांगली व्हावी म्हणून तुम्ही सकाळच्या वेळेस मालिश करू शकता. तर रात्रीच्या वेळी देखील मालिश केल्यास बाळाला झोप चांगली लागते. तर या गोष्टी लक्षात घेऊन तुमच्या आणि बाळाच्या सोयीनुसार तुम्ही बाळाला मालिश करू शकता.

बाळाला मालिश करण्याची योग्य पद्धत

बाळाला मालिश करण्याची योग्य पद्धत माहित असायला हवी. मालिश करण्यापूर्वी आपले हात स्वच्छ धुवा. बाळाला पाठीवर झोपवून त्याच्याशी बोलत, गप्पा मारता मालिश करा. मालिश करताना नेहमी बाळाच्या डोळ्यात पाहावे आणि त्याला आश्वस्त करावे. मालिश ही पायापासून सुरु करून मग हळूहळू डोक्यापर्यंत यावे. मालिश करताना आपला हात नेहमी गोलाकार दिशेतच फिरवावा. नंतर त्याला पोटावर झोपवून शरीराच्या मागच्या भागाची योग्य पद्धतीने मालिश करावी.

बाळाला मालिश करताना घ्यावयाची खबरदारी

सहा महिन्यांपेक्षा कमी वयाच्या बाळाला अगदी हलक्या हाताने, संथपणे मालिश करावी. मालिश करताना घरातील वातावरण शक्य तितके शांत ठेवावे. जर आईला मालिश करणे शक्य नसेल तर अनुभवी स्त्रीला मालिश करण्यास सांगावे. मालिश करताना बाळाला त्रास होत असल्याचे दिसताच योग्य वेळी थांबावे. मालिश करताना वापरण्यात येणारे तेल चांगल्या गुणवत्तेचे असल्यास उत्तम! या आणि अशा काही खबरदारी तुम्ही बाळाला मालिश करताना घ्यायला हव्यात.